Widdersgrind + Alpiglemäre (statt Schibä+Märe)
| Datum | Samstag, 18. Februar 2023 |
| Teilnehmer | 5 |
| Angemeldet | 7 |
| Tourenbericht Dismal gits is äs Brichtli in Mundart. We dr Vatter siit “i ha mitm Outo z Huus u z Him chöne fahre, so eber ischt” de frage i mi scho, was äch das hisst, für üsi Skitour im Naturpark Gantrisch. Anschinend macht sig o dr Toureliiter Erwin Burn Gedanke. Per Whatsapp tiilt är mit, dass z Gipfelziel wäg dr aktuelle “Schneemangellage” enderet. Aha, mir merkä: dä Winter herrscht ned Strommangellage sondern Schneemangellage. Vilicht sötte mir nägst Herbst Schneekanoni chuufe statt Stromgeneratore oder WC-Papier ;-) Im süsch bitterchalte Hengstschlund plätscheret di jungi Hengstsense fröhlich vor sich häre, als weris lengschtä Ustig. Am 20 ab 8i luft dr Schnee o scho i flüssiger Form vodä Dächer i Trufchennel vodä Hütti ufdr Grenchenalp. Dr Erwin redt zwar ging no vo Pulverschnee. Aber ob är sälber glubt, was är da verzellt, isch fraglich? Ono bir Znünipouse ufdr Grenchegalm mint är, dass mir hüt viel Zit hige, dr Schnee schmelzi üs ned drvo. We mir aber vo hie us a di mehrhitlich eberi Site vor Alpiglemäre guge, wo mir ja de ono häre wettä, hi mir da so üsr Zwiefel. Doch zerst stige mir no ufe Widdersgrind. Scho ufm Schlussufstig bewundere mir z Panorama: ufdr inte Site Neuenburgersee, Murtensee u dr Chasseral, ufdr andere Site di ganzi Bärgchötti vom Wetterhorn über Wildstrubel und Matterhorn bis zur Kaiseregg. Dr Gipfel hi mir für üs. Früi ufsta het sich glohnt. O für d Abfahrt, wo mir natürlich Sulz- statt Pulverschnee aträffe. Doch nachdäm dr Erwin ufm Gipfel wie folgt het über d Abfahrtsroute informiert: “mir fahre dm Schnee nachi” ischs üs egal, was für Schneeverhältnis herrsche, Huptsach äs het überhupt no Schnee. U Sulz isch ja o sehr schön zum Fahre. Bir Alp Schattig Riprächte tüe mir umi aafääle. Vo Schattig merkä mir im Ufstieg zur Alpiglemäre allerdings rein gar nüt. D Suna hiitz ordentlich. Vom Widdersgrind us het dr Erwin d Schneefläcke ar Alpiglemäre gstudiert u so finde mir no ä guete Wäg bis zoberst. Mitm Gnuss vo Christophs Ovo-Güetzi hoffe mir, dass der Schnee zwar älwä ned besser wird aber vilicht wenigstens lenger cha häreha. Drum o üse Spruch des Tages: so für Endi April chasch nüt säge zudä Schneeverhältnis. U als Bürogummi säge i mir sowieso: Huptsach ussenache gsi. Mir his lustig u guet ka u ä schöni Skitour gmacht ire üs ender chli unbekannte Skitouregägend idä Voralpe. Bericht: Monika Schranz |
|
SAC Sektion Wildstrubel
·
info@sac-wildstrubel.ch
