Wistätthorn von St. Stephan aus
| Datum | Mittwoch, 22. Februar 2023 |
| Teilnehmer | 6 |
| Angemeldet | 9 |
| Tourenbericht Ah, d Michèle hetti o nu e Mittwuchtour am 22.Februar… i mälde mi doch mal a… Schön, chunnsch ou, isch d Antwort… aber wohäre wott si ächt, nehmi mig Wunder, bi däre Schneelaag... Am Mentig chunnt d Antwort per SMS: Tourenziel Wistätthorn ab St. Stephan… OK… der Talbode isch uf 998m u ds Horä uf 2362… hets äch da nu Schnee, i so tüüfä Lagä?... Mir si gspannt, u fahre am Mittwuch morgä mit em grosse Auto vor Brigitt z füft nach St.Stephan. Bim Bahnhof träffe wir üs mit üser ufgstelltä Toureliiteri, u fahre nu es Stück ds Strässli uehi, bis zum Gräbli uf der Flueh. Die erstä 50 hm luufä wir nu der Wanderwäg uf, u scho chöne wir d Ski alegä… wär hetti das denkt, witer giits alls im Schnee... gmüetlich stigä wir bi bestem Wätter bis ufds Wistätthorä… obna gniesse wir d Ussicht u der Blick ids grüene Simmetal. D Abfahrt isch besser als erwartet, gwüss nu chli Sulz, u gar nüt uweg. Z fride cherä wir nu im ne Gasthuus i, u la dä schöö Tag revue passierä. Dankä allnä für die flotti Kameradschaft, u e bsundera Dank ar Michèle für die herrligi Tour, wo sie da usgsuecht het. Es isch schöö gsii! Bericht: Mädi Lauber |
|
SAC Sektion Wildstrubel
·
info@sac-wildstrubel.ch
